KALUSHA BWALYA AMPASHA FIGO KUWA URAIS FIFA BADO.

RAIS wa Shirikisho la Soka la Zambia, Kalusha Bwalya amesema ni mapema mno kwa Luis Figo kugombea urais wa Shirikisho la Soka la Dunia-FIFA. Figo mwenye umri wa miaka 42 ambaye amewahi kuwa mchezaji bora wa dunia ni mmoja kati ya wagombea watatu waliojitokeza kutaka kumng’oa rais wa sasa wa FIFA Sepp Blatter Mei 29 mwaka huu. Bwalya ambaye amewahi kunyakuwa tuzo ya mchezaji bora wa Afrika mwaka 1988 amesema Figo alikuwa mchezaji bora mwenye kiwango cha dunia lakini angependa zaidi aanzie kwa kugombea katika Shirikisho la Soka la nchini kwake Ureno kabla ya kuja juu. Bwalya aliendelea kudai kuwa uzoefu ambao angeupata nyumbani kwao ungemsaidia lakini kwa hivi sasa atakabiliwa na wakati mgumu kwa mawazo yake. Nguli huyo aliendelea kudai kuwa vyama vingi vya soka vimeshaamua nani wa kumpigia kura na Afrika itaendelea kumuunga mkono Blatter kwa miaka mingine minne pamoja na kukalia kiti hicho toka mwaka 1998.