BARCELONA YAMALIZA MZUNGUKO WA KWANZA LA LIGA BILA KUFUNGWA.

KLABU ya Barcelona imeendelea kujikita kileleni mwa msimamo wa Ligi Kuu nchini Hispania maarufu kama La Liga baada ya kumaliza mzunguko wa kwanza wa ligi hiyo wakiwa wanaongoza kwa alama 55 wakati waliposhinda kwa mabao 3-1 dhidi ya Malaga jana. Barcelona ambayo inanolewa na Tito Vilanova imeshinda mechi 18 kati ya 19 za La Liga na kuipita Atletico Madrid inayoshika nafasi ya pili kwa alama 11 huku mahasimu wao Real Madrid wakiwa katika nafasi ya tatu kwa tofauti ya alama 18. Katika mchezo huo mshambuliaji nyota wa Barcelona Lionel Messi ndiye aliyefunga bao la kuongoza huku akitoa pasi za mwisho kwa mabao mawili mengine yaliyofungwa. Mpaka sasa Messi ambaye ni mchezaji bora wa dunia amefunga mabao 28 katika La Liga akiwa amepitwa kwa bao moja na mshambuliaji wa zamani wa Barcelona Ronaldo de Lima aliyeweka rekodi ya kufunga mabao 29 katika nusu ya msimu wa mwaka 1996-1997.