HAKUNA WA KUFANANISHWA NA MESSI - NEYMAR.

MSHAMBULIAJI wa kimataifa wa Brazil na klabu ya Santos, Neymar amemsifu nyota wa Barcelona, Lionel Messi na kudai kuwa hakuna wa kufananishwa naye kwasasa. Messi alifanikiwa kunyakuwa tuzo ya mchezaji bora wa dunia maarufu kama Ballon d’Or kwa mara ya nne mfululizo na Neymar anakiri tuzo hiyo ilienda kwa mtu sahihi. Akihojiwa Neymar amesema kwa kipindi hiki hakuna mchezaji unayeweza kumfananisha na Messi na alistahili tuzo hiyo kwa mambo aliyofanya msimu uliopita kwa klabu yake, timu ya taifa na yeye binafsi. Nyota huyo mwenye miaka 20 ambaye kumekuwa na tetesi za kujiunga na Messi kwenye timu ya Barcelona amekana tetesi hizo na kudai kuwa hajazungumza na klabu yoyote kwakuwa bado ana mkataba na Santos ambao utamalizika mwakani na ana furaha kuwepo hapo.