REAL MADRID ITASONGA MBELE - RONALDO.

MSHAMBULIAJI nyota wa klabu ya Real Madrid, Cristiano Ronaldo ana uhakika wa timu yake hiyo kuifunga Manchester United na kusonga mbele katika hatua ya robo fainali ya michuano ya Ligi ya Mabingwa Ulaya. Mshambuliaji huyo wa kimataifa wa Ureno ambaye aliwahi kung’ara akiwa United kati ya mwaka 2003 hadi 2009 amekiri kuwa United ambao ndio vinara wa Ligi Kuu nchini Uingereza ni timu ngumu lakini watavuka kikwazo hicho. Ronaldo amesema anaamini mambo yatakwenda sawasawa kwani kwa mawazo yake Madrid ni timu bora lakini wanatakiwa kuonyesha hilo uwanjani kwasababu United ni timu inayocheza kwa umoja na hatari sana katika miaka ya karibuni. Mchezo wa kwanza katika hatua ya timu 16 bora baina ya timu hizo utachezwa katika Uwanja wa Santiago Bernabeu Februari 13 mwaka huu.