ANCELOTTI ATHIBITISHA KUPOKEA MAOMBI KUTOKA REAL MADRID.

MENEJA wa klabu ya Paris Saint-Germain-PSG, Carlo Ancelotti amethibitisha kuwa amepokea maombi kutoka klabu ya Real Madrid baada ya kutangaza nia yake ya kuondoka PSG mwishoni mwa msimu huu. Ancelotti ambaye ni raia wa Italia kwa kipindi kirefu amekuwa akihusishwa na tetesi za kuondoka PSG majira ya kiangazi pamoja na kuiwezesha klabu hiyo kushinda taji la kwanza la Ligi Kuu nchini Ufaransa kwa kipindi cha miaka 18. Kocha huyo alichaguliwa kuwa kocha bora wa msimu sambamba na kocha wa klabu ya Saint-Etiennes Christophe Galtier Jumapili iliyopita lakini baada ya kukabidhiwa tuzo hiyo Ancelotti aliweka wazi msimamo wake wa kutaka kuondoka PSG. Ancelotti amesema tayari ameshafanya mazungumzo na rais wa klabu hiyo pamoja na mkurugenzi wa michezo Leonardo na sasa anasubiri uamuzi wao ili kujua mustakabali wake. Pia katika tuzo hizo mshambuliaji nyota wa PSG Zlatan Ibrahimovic alichaguliwa kuwa mchezaji bora wa mwaka baada ya kumaliza akiwa mfungaji bora kwa kufunga mabao 29.