ITAKUWA BAHATI KAMA MURRAY ATACHEZA FRENCH OPEN - JUDY.

MAMA wa mchezaji nyota wa tenisi kutoka Uingereza, Andy Murray aitwaye Judy amedai kuwa mwanae huyo atatilia maana kuwa fiti michuano ya Wimbledon zaidi kuliko michuano ya wazi ya Ufaransa. Murray mwenye umri wa miaka 26 alijitoa katika mchezo wa mzunguko wa pili wa michuano ya wazi Italia jana kutokana na maumivu ya mgongo yaliyomsumbua na kuzua hofu ya ushiriki wake katika michuano ya wazi ya Ufaransa na Wimbledon. Nyota huyo atafanyiwa uchunguzi kuhusu tatizo lake hilo lakini mama yake amedai kuwa itakuwa ni bahati kwa nyota huyo kushiriki michuano ya wazi ya Ufaransa itakayoanza kutimua vumbi Mei 26 mwaka huu. Judy amesema lengo kubwa la Murray ni kuwa katika kiwango chake cha juu ifikapo michuano ya Wimbledon hivyo hatashangazwa kama akijitoa kwenye michuano ya wazi ya Ufaransa ili aweze kupona sawasawa.