MARADONA AKATAA KUWA BALOZI WA RAJA CASABLANCA.

KLABU ya Raja Casablanca ya Morocco imedai kuwa nguli wa zamani wa soka wa Argentina Diego Maradona amepiga chini ombi lao la kumtaka awe mshauri na balozi wao. Maradona mwenye umri wa miaka 52, ambaye alikuwa katika kikosi cha Argentina kilichonyakuwa Kombe la Dunia mwaka 1986 alikataa ombi la Casablanca baada ya kuamua kuongeza mkataba wa kuwa balozi wa michezo huko Dubai ambao una thamani ya dola milioni tano. Raja ambao ni mabingwa wapya wa Morocco walitaka kutumia umaarufu wa kocha huyo wa zamani wa Argentina kuitangaza timu hiyo kabla na wakati wa michuano ya Kombe la Klabu ya Dunia ambayo itafanyika nchini Morocco Desemba mwaka huu. Maofisa wa Raja walidai kuwa Maradona alionyesha nia ya kutaka kufanya kazi hiyo lakini mpaka sasa hawajaelewa kwanini ameamua kukataa.