RATIBA YA EUROPA LEAGUE: JUVENTUS KUPEPETANA NA OLYMPIQUE LYON.

KLABU ya Juventus ya Italia imepangwa kupepetana na Olympique Lyon katika robo fainali ya michuano ya Europa League baada ya ratiba iliyopangwa makao makuu ya Shirikisho la Soka barani Ulaya yaliyopo jijini Nyon, Switzerland. Mabingwa hao wa Serie A wamekuwa katika mpango wa kuhakikisha wanafika fainali ambayo itachezwa katika ardhi yao lakini itabidi wawaondoe Wafaransa hao kama watataka kufika huko. Kwa upande mwingine klabu ya AZ imepangwa kucheza vigogo wa jiji la Lisbon Benfica huku wenzake Porto wao wakivaana na Sevilla wakati Basel wao watachuana na Valencia, timu zote zikitafuta nafasi ya kutinga nusu fainali ya michuano hiyo. Mechi za mkondo wa kwanza za michuano hiyo zinatarajiwa kuchezwa April 3 huku zile za marudiano zikitarajiwa kuchezwa Aprili 10. Ratiba ya nusu fainali itapangwa Aprili 11 sawa na ile ya Ligi ya Mabingwa huku fainali ya michuano hiyo ikitarajiwa kuchezwa Mei 14 mwaka huu jijini Turin.