WAJUMBE WA CONCACAF WAMFANANISHA BLATTER NA YESU.

RAIS wa Shirikisho la Soka Duniani-FIFA, Sepp Blatter amefananishwa na Yesu, Nelson Mandela na Winston Churchill wakati wajumbe 10 wa Concacaf walipojitangaza kumuunga mkono katika uchaguzi ujao wa urais utakaofanyika Mei mwaka huu. Kauli ya wajumbe hao ilitolewa wakati wa mkutano mkuu wa Shirikisho la Soka la Amerika Kaskazini, Kati na Caribbean-Concacaf. Rais wa Chama cha Soka cha Dominica, Osiris Guzman alimfananisha Blatter na majina watu maarufu katika historia duniani akiwamo Moses, Abraham Lincoln na Martin Luther King. Wajumbe hao waliendelea kummwagia sifa mbalimbali wengine wakimfananisha na Yesu, Mandela na majina mengine makubwa ya wanaharakati waliotingisha dunia enzi zao. Blatter ni mmoja kati ya wagombe wane katika kinyang’anyiro cha urais wa FIFA, wengine wakiwa nguli wa zamani wa soka wa kimataifa wa Ureno Luis Figo, rais wa Shirikisho la Soka la Uholanzi Michael van Praag na Mwana Mfalme wa Jordan Ali Bin Al Hussein. Uchaguzi wa shirikisho hilo unatarajiwa kufanyika Mei 30 mwaka huu huko Zurich, Uswisi.