FABREGAS ALITAMANI KUCHEZA SAMBAMBA NA SUAREZ.

KIUNGO wa Chelsea, Cesc Fabregas amehuzunishwa kukosa nafasi ya kucheza sambamba na Luis Suarez katika klabu ya Barcelona na kuongeza kuwa na matumaini rafiki yake Lionel Messi atakuwa fiti kwa ajili ya mchezo wa Classico dhidi ya mahasimu wao Real Madrid. Fabregas alicheza kwa misimu mitatu Barcelona lakini aliondoka msimu ambao Suarez naye aliwasili akitokea Liverpool kiangazi mwaka jana hivyo kumaanisha wawili hao kutopata nafasi ya kucheza pamoja. Akihojiwa Fabregas mwenye umri wa miaka 28 amesema Barcelona ina wachezaji wazuri, na safu yao ya ushambuliaji inayoundwa na watu watatu inaweza kuamua mchezo. Kiungo huyo aliendelea kudai kuwa pamoja na kuwa Messi hayupo lakini Neymar na Suarez wamekuwa wakiendelea kuimarisha vyema safu hiyo. Fabregas alimsifia Suarez akidai kuwa ni mshambuliaji ambaye angependa kucheza pamoja naye kwani wangeelewana vyema.