MOURINHO AIBUKA UZINDUZI WA FILAMU MPYA YA RONALDO.

KUNA baadhi ya watu wangetegemea Jose Mourinho kutulia hivi sasa, lakini meneja huyo wa Chelsea aliyechini ya shinikizo ameonekana kuwa mtu mwenye kujiamini na asiyeogopa. Pamoja na matokeo mabovu ambayo timu yake imekuwa ikipata, Mourinho jana aliibuka katika uzinduzi wa filamu mpya ya Mreno mwenzake Cristiano Ronaldo. Mourinho ambaye alifungiwa kuhudhuria mchezo wa Ligi Kuu kati ya Chelsea na Stoke City Jumamosi iliyopita, alialikwa katika uzinduzi huo wa filamu unaoelezea maisha ya mshambuliaji huyo nyota wa Real Madrid huko Leicester Square. Meneja huyo ameibuka katika shughuli hiyo pamoja na taarifa kuwa wawili hao wamekuwa hawako katika mahusiano mazuri wakati Mourinho akiinoa Madrid. Mbali na Mourinho lakini pia kulikuwa majina mengine makubwa katika soka akiwemo meneja wa zamani wa Manchester United Sir Alex Ferguson ambaye amewahi pia kumfundisha Ronaldo.