UPANDE MMOJA WA JUKWAA PARC DE PRINCES KUITWA JINA LA IBRAHIMOVIC.

RAIS wa Paris Saint-Germain-PSG, Nasser al-Khelaifi amebainisha kuwa mabingwa hao wa Ufaransa wanapanga kuupa jina la mshambuliaji anayeondoka Zlatan Ibrahimovic upande wa jukwaa la uwanja wa timu hiyo. Ibrahimovic mwenye umri wa miaka 34 alitangaza Ijumaa iliyopita kuwa anatarajiwa kuondoka mwishoni mwa msimu huu, ingawa PSG wamesema kuwa amekubali kurudi katika uongozi pindi atakapostaafu soka lake. Jumamosi iliyopita mshambuliaji huyo wa kimataifa wa Sweden alifunga mabao mawili katika mchezo wa mwisho wa ligi ambao PSG walishinda mabao 4-0 dhidi ya Nantes. Kwa kufanya hivyo, Ibrahimovic aliipita rekodi iliyowekwa na carlos Bianchi ya kufunga mabao 37 katika msimu mmoja wa Ligue 1 hivyo kumaanisha kuwa sasa amefikisha mabao 154 katika mashindano yote toka ajiunge na klabu hiyo akitokea AC Milan 2012.