NI NGUMU KUWEKA REKODI YA MSIMU ULIOPITA - MOURINHO.

Jose Mourinho.

KOCHA wa klabu ya Real Madrid, Jose Mourinho amesema kuwa klabu hiyo ndiyo ilikuwa klabu bora Ulaya msimu uliopita na kwamba itakuwa vigumu kufikia rekodi waliyoweka msimu uliopita. Msimu uliopita Madrid ilifanikiwa kujikusanyia alama 100 na kufunga mabao 121 yaliyowawezesha kunyakuwa taji la Ligi Kuu nchini Hispania maarufu kama la Liga kwa mara ya kwanza katika miaka mine na wanatarajiwa kuanza kutetea taji lao hilo baadae leo wakati watakapoikaribisha Valencia katika Uwanja wa Santiago Bernabeu. Akihojiwa na waandishi wa habari Mourinho amesema kuwa hawana mpango wa kuvunja rekodi hiyo waliyoweka msimu uliopita wanachohitaji wao ni kuhakikisha wanatetea taji lao walilochukua msimu uliopita. Madrid walimaliza ubabe wa Barcelona ambao walikuwa wanashikilia taji hilo kwa miaka mitatu mfululizo lakini malengo yao makubwa ni kunyakuwa taji la Ligi ya Mabingwa Ulaya, taji ambalo msimu uliopita lilinyakuliwa na timu ya zamani ya Mourinho, Chelsea. Msimu uliopita Madrid walitolewa katika hatua ya nusu fainali ikiwa ni msimu wa pili wanamaliza katika nafasi hiyo baada ya kutolewa na Bayern Munich kwa changamoto ya mikwaju ya penati.