AL MERREIKH YATINGA NUSU FAINALI KOMBE LA SHIRIKISHO.

KLABU ya Al Merreikh ya Sudan imefanikiwa kukata tiketi ya kucheza nusu fainali ya michuano ya Kombe la Shirikisho baada ya kuwasambaratisha ndugu zao Al Ahly Shandy kwa bao 1-0 katika mchezo uliochezwa jana. Bao pekee katika mchezo huo lilifungwa na beki raia wa Brazil Eder Lima katika dakika ya 75 ya mchezo ambapo mashabiki wa Al Shandy walikuwa wakirusha mawe uwanjani kupinga uamuzi wa mwamuzi wa mchezo huo ambaye anatoka Morocco. Tukio limekuja ikiwa ni wiki mbili zimepita toka wafuasi wa Al Shandy kuwarushia mawe wachezaji wa Merreikh wakati wanatoka katika mji wa Omdurman na kumuumiza golikipa Essam Al Hadary. Merreikh wanaongoza kundi A wakiwa na alama 10 wakifuatiwa kwa karibu na mahasimu wao Al Hilal ambao wana alama nane huku Ahly wakiwa na alama tatu pekee wakati InterClube ya Angola ambao walitinga nusu fainali ya michuano hiyo mwaka 2011 wakishika mkia. Hilal inahitaji sare ya aina yoyote wakati watakapoikaribisha Ahly Octoba 5 mwaka huu ili waweze nao kukata tiketi ya kucheza nusu fainali ya michuano hiyo ambayo mshindi wake ataibika na kitita cha dola 660,000.