HATMA YA HAMILTON NA MCLAREN BADO MASHAKANI.

DEREVA nyota wa mbio za magari za langalanga, Lewis Hamilton ameweka wazi kuwa hata zipa nafasi taarifa zilizozagaa kuhusu majadiliano ya mkataba wake zimfanye ashindwe kujiandaa ili aweze kushinda taji lake la pili la mashindano hayo akiwa na timu ya MacLaren. Hamilton ambaye mkataba wake na McLaren unatarajiwa kuisha mwishoni mwa msimu huu, amekuwa akihusishwa na taarifa kuwa ataikacha timu hiyo na kuhamia Marcedes kwenda kuziba pengo la Michael Schumacher. Dereva huyo ambaye ni bingwa wa dunia wa mashindano hayo mwaka 2008 aliacha kila mtu akibashiri baada ya kushinda mashindano ya Grand Prix ya Italia baada ya kuwaambia kuwa bado hajasaini mkataba mpya na timu yoyote. Akihojiwa kuhusiana na mashindano ya Grand Prix yanayotarajiwa kufanyika nchini Singapore wiki hii, Hamilton amesema kuwa amejipanga kushinda mashindano hayo na hicho ndio anachofiria kwasasa na sio mambo mengine.