AL AHLY KUKWAANA NA ESPERANCE KATIKA FAINALI LIGI YA MABINGWA.

WAKONGWE wa soka nchini Misri klabu ya Al Ahly imefanikiwa kutinga hatua ya fainali ya michuano ya Ligi ya Mabingwa barani Afrika baada ya kufanikiwa kuifunga Sunshine Stars ya Nigeria kwa bao 1-0 katika mchezo wa nusu fainali ya pili. Al Ahly sasa imetinga katika hatua hiyo baada ya kushinda jumla ya mabao 4-3 katika michezo miwili waliyocheza na Sunshine ambapo katika mchezo wa kwanza uliochezwa nchini Nigeria walifanikiwa kuondoka na sare ya mabao 3-3. Bao pekee la Al Ahly liliwekwa kimiani na Mohamed Nagui katika dakika ya 28 akimalizia pasi murua ya Hossam Ghaly ambapo wanatarajiwa kukutana na Esperance ya Tunisia katika mchezo wa fainali. Fainali hiyo itakuwa ni ya kwanza kwa Al Ahly toka wanyakue taji hilo mwaka 2008 huku kwa upande wa mabingwa watetezi wa taji hilo Esperance inakuwa fainali zake za tatu mfululizo.