SUDAN WAKATA RUFANI FIFA.

SHIRIKISHO la Soka la Sudan limeandika barua rasmi kwa Shirikisho la Soka Duniani-FIFA kupinga uamuzi wa shirikisho hilo kuwanyang’anya ushindi. FIFA iliinyang’anya ushindi Sudan wa mabao 2-0 iliyopata dhidi ya Zambia na kuwapa mabingwa hao wa Afrika alama tatu na mabao matatu baada ya Sudan kumchezesha Saif Eldin ambaye alikuwa amefungiwa mchezo mmoja. Kocha wa Sudan Mohammed Abdallah amekiri kuwa ni kweli walimchezesha mchezaji huyo lakini amesema FIFA walipaswa kuwapa adhabu nyingine na sio kuwanyang’anya ushindi kwani walipata tabu kuwafunga mabingwa hao wa Afrika. Abdallah amesema kuwa walimchezesha mchezaji huyo kwakuwa hawakupata taarifa yoyote kuhusu kufungiwa kwa mchezaji huyo na kwasasa wanasubiri majibu ya rufani yao waliyotuma.