ETO'O AREJEA KUONGEZA NGUVU CAMEROON.

MSHAMBULIAJI nyota wa kimataifa wa Cameroon, Samuel Eto’o amerejea rasmi katika kikosi cha nchi hiyo wakati kikipambana kutafuta tiketi ya kufuzu michuano ya Mataifa ya Afrika 2013 dhidi ya Cape Verde mwishoni mwa wiki hii. Cape Verde ambao waliifunga Cameroon kwa mabao 2-0 katika mchezo wa kwanza watakuwa wakitafuta nafasi ya kucheza michuano hiyo kwa mara ya kwanza pale watakapokuwa wageni wao katika mchezo wa pili ambao utapigwa jijini Younde. Eto’o ambaye alikuwa amejitoa katika mchezo wa kwanza baada ya kushindwa kuelewana na viongozi wa timu hiyo alikubali kurejea kuongeza nguvu baada ya kufanya kikao na Waziri Mkuu wa nchi hiyo. Akiohijiwa kuhusiana na mchezo huo wa Jumapili Eto’o amesema kuwa kama wakiacha tofauti zinazowazunguka hivi sasa na kumuweka mungu mbele anaamini kuwa watalirejesha soka la Cameroon katika ramani ya dunia tena kama ilivyokuwa hapo zamani.