BANYANA BANYANA, EQUATORIAL GUINEA KUKWAANA FAINALI YA MATAIFA YA AFRIKA KESHO.

TIMU ya taifa ya soka ya wanawake ya Afrika Kusini maarufu kama Banyana Banyana inakabiliwa na changamoto ngumu ya kuchuana na wenyeji Equatorial Guinea katika fainali ya michuano ya Mataifa ya Afrika kwa upande wa wanawake itakayofanyika katika Uwanja wa Malabo Jumapili. Banyana Banyana imetinga katika hatua baada ya kupata ushindi wa kihistoria wa bao 1-0 dhidi ya Nigeria katika mchezo wa nusu fainali ya michuano hiyo iliyochezwa Jumatano iliyopita katika Uwanja wa Bata. Wenyeji Equatorial Guinea wao walitinga hatua hiyo baada ya kuwasambaratisha vigogo wengine Cameroon kwa mabao 2-0 na kuendeleza rekodi yao kutopoteza mchezo katika michuano hiyo. Kocha wa Banyana Banyana Joseph Mkhonza ametamba kusafiri na kombe la ubingwa wa michuano hiyo kurejea nalo Afrika Kusini mara baada ya kuifunga Equatorial Guinea katika mchezo wa Jumapili.