HUWA NAWASILIANA MARA KWA MARA NA VILANOVA - ROURA.

KOCHA msaidizi wa klabu ya Barcelona, Jordi Roura amebainisha kuwa huwa anafanya mawasiliano na kocha wa klabu hiyo Tito Vilanova wakati wa mechi za klabu hiyo katika kipindi hiki ambacho hayupo. Vilanova ameshindwa kuwepo katika benchi la ufundi la klabu hiyo katika michezo minne iliyopita akiwa anaendelea na matibabu ya kansa ya tezi jijini New York, Marekani. Hatahivyo, Roura amesisitiza kuwa Vilanova bado ana nafasi kubwa katika maandalizi ya kila mchezo ya timu hiyo pamoja na kushauriana na msaidizi wake huyo katika baadhi ya maamuzi katika mechi. Roura amesema kuwa huwa anafanya mawasiliano na kocha huyo kwa simu na mtandao wa intaneti hivyo pamoja na umbali aliokuwepo lakini wamekuwa wakiwasiliana kwa kila kitu na kuna muda huwa anatizama mazoezi ya timu hiyo kupitia picha za video.