UEFA CHAMPIONS LEAGUE: CELTIC, VALENCIA ZASHINDWA KUTUMIA VYEMA VIWANJA VYAO VYA NYUMBANI.

MENEJA wa klabu ya Celtic Neil Lennon amekiri kuwa itakuwa ni bahati kwao kama watafanikiwa kusonga mbele katika hata ya robo fainali ya michuano ya Klabu Bingwa Ulaya baada ya kukubali kipigo cha mabao 3-0 kutoka kwa Juventus jana usiku. Juventus ambao ni mabingwa wa Italia walifanikiwa kuonyesha mchezo wa kuvutia katika mchezo huo uliofanyika jijini Glasgow na kupata ushindi huo muhimu ambao umewaweka katika nafasi nzuri ya kusonga mbele wakati watakaporudiana nchini Italia wiki mbili zijazo. Katika mchezo mwingine wa michuano hiyo uliochezwa jana timu ya Paris Saint-Germain ilifanikiwa nayo kuibuka na ushindi wa mabao 2-1 ugenini dhidi ya Valencia ya Hispania. Michuano hiyo inaendelea tena leo ambapo Real Madrid wataikaribisha Manchester United katika Uwanja wa Santiago Bernabeu huku kukiwa na tambo mbalimbali baina ya makocha wa timu zote mbili kila mmoja akijinadi kuibuka mshindi. Wakati mchezo mwingine wa timu 16 bora utazikutanisha timu za Shakhtar Donetsk ya Ukraine itakayoikaribisha Borussia Dortmund ya Ujerumani.