FERGUSON AMETIMIZA NDOTO ZANGU - VAN PERSIE.

MSHAMBULIAJI wa klabu ya Manchester United, Robin van Persie amemshukuru Sir Alex Ferguson kwa kumsaidia kutimiza ndoto zake kwa kushinda taji la Ligi Kuu nchini Uingereza msimu huu. Kufuatia uhamisho wake uliogharimu kiasi cha paundi milioni 24 kutoka Arsenal msimu uliopita, mabao 25 aliyofunga Van Persie mwenye umri wa miaka 29 msimu huu yameisaidia klabu hiyo kutwaa taji lake la 20 la ligi hiyo. Van Persie amesema imekuwa ni heshima kubwa kwake kufanya kazi chini Ferguson mwenye umri wa miaka 71 ambaye atastaafu rasmi mwishoni mwa msimu huu baada ya kuifundisha klabu hiyo kwa muda wa miaka 26. Nyota huyo aliendelea kusema amesikitishwa na kitendo cha kocha huyo kuamua kustaafu lakini anafurahi kwamba amepata nafasi ya kipekee ya kufanya nae kazi na anamuombea heri yeye pamoja na familia yake.