FIFA YAHAKIKISHIWA KUKABIDHIWA CORINTHIANS ARENA KWA WAKATI.

SHIRIKISHO la Soka Duniani-FIFA limehakikishiwa kuwa Uwanja wa Corinthians uliopo jijini Sao Paulo utakaotumika kwa ajili ya mechi za Kombe la Dunia 2014 utakamilika kwa wakati. Uwanja huo ulizua tafrani kutokana na ukarabati wake wa kusuasua ulioanza Mei mwaka 2011 na kupelekea FIFA kuitisha kikao cha dharura kujadili ukamilikaji wa uwanja huo. Kulikuwa na hatari kuwa baadhi ya mechi zilizopangwa kuchezwa katika uwanja huo ikiwemo mechi ya ufunguzi ya Kombe la Dunia 2014 zinaweza kuhamishiwa katika miji mingine kama FIFA wataona ujenzi wa uwanja huo utashindwa kukamilika kwa wakati. Lakini Katibu Mkuu wa FIFA Jerome Valcke amesema sasa wameridhishwa na maelezo waliyopewa katika kikao cha dharura walichokutana kwa kuhakikishiwa kuwa watakabidhiwa uwanja huo kabla ya Desemba 31 na kutaka miji mingine kuiga mfano huo.