MOURINHO AMBWATUKIA WEBB.

KOCHA wa klabu ya Real Madrid Jose Mourinho amemkemea mwamuzi Howard Webb baada ya kikosi chake kushindwa kupata nafasi ya kucheza fainali ya Ligi ya Mabingwa barani Ulaya na Borussia Dortmund jana. Katika mchezo huo Madrid walibaki kidogo wafanikiwe baada ya kupoteza mchezo wa kwanza kwa mabao 4-1 wiki iliyopita baada ya kufanikiwa kufunga mabao 2-0 katika mchezo wa jana uliochezwa katika Uwanja wa Santiago Bernabeu. Mourinho ambaye anamfahamu vyema Webb wakati akiwa meneja wa Chelsea, amesema mwamuzi huyo alitakiwa kumtoa nje beki wa Dortmund Mats Hummels kwa kushika mpira katika kipindi cha pili. Mourinho amesema hana shaka kwamba Webb ni mwamuzi mzuri lakini ameshangaa kwanini hakumpa mchezaji huyo kadi nyekundu kwa kosa kushika mpira kwa makusudi alilofanya kwenye mchezo huo.