MESSI AMUACHA MARADONA KWA UFUNGAJI ARGENTINA.

MSHAMBULIAJI nyota wa kimataifa wa Argentina, Lionel Messi amemuacha nguli wa soka wan chi hiyo Diego Maradona katika orodha ya wafungaji kufuatia mabao matatu aliyofunga katika mchezo wa kirafiki dhidi ya Guatemala ambao walishinda kwa mabao 4-0. Nyota huyo wa Barcelona alifungua karamu ya mabao katika dakika ya 15 ya mchezo kabla ya kuongeza lingine muda mchache kabla ya mapumziko huku bao la tatu akifunga katika dakika ya 52 na kufikisha jumla ya mabao 35 kwa timu ya taifa na kumuacha Maradona ambaye aliwahi kuifungia timu hiyo mabao 34. Akihojiwa mara baada ya mchezo huo Messi kama kawaida yake alidai kumzidi Maradona kwa mabao sio suala muhimu kwake kitu cha msingi ni kwamba walicheza kwa umoja ndio maana wamepata matokeo mazuri. Messi sasa anawakaribia nyota wengine wa nchi hiyo ambao ni Hernan Crespo huku bado akiwa na safari ndefu ya kumfikia kinara wa ufungaji wa nchi hiyo Gabriel Batistuta ambaye kipindi chake akiichezea Argentina alifunga mabao 56.