PELLEGRINI ATAMBA KUPELEKA MATAJI MAN CITY.

MENEJA mpya wa klabu ya Manchester City, Manuel Pellegrini ameahidi kuiletea klabu hiyo mataji kwa staili ya aina yake baada ya muda mfupi kutajwa kuiongoza kwa kipindi cha miaka mitatu ijayo. Pellegrini ambaye ni raia Cile msimu uliopita alikuwa akiinoa klabu ya Malaga ya Hispania kabla ya kuchukua mikoba ya Roberto Mancini aliyetimuliwa City. Kibarua chake akiwa City, Pellegrini atatakiwa kunyakuwa taji la Ligi Kuu ya Uingereza ambalo kwasasa linashikiliwa na majirani zao wa Manchester United na pia kuifikisha timu hiyo mbali katika michuano ya Ligi ya Mabingwa Ulaya kitu ambacho Mancini alishindwa. Pellegrini amesema kila mtu anajua kama ukija kufundisha klabu kama City utatakiwa kushinda vikombe kutokana na hela nyingi ambazo klabu hiyo imewekeza kwa ajili ya kuimarisha kikosi chao. Kocha huyo ana uzoefu wa zaidi wa miaka 25 barani Amerika Kusini na nchini Hispania na pia amefanikiwa kuzifikisha mbali katika michuano ya Klabu Bingwa barani Ulaya timu za Malaga na Villarreal wakati akiziongoza.