MONACO WAMCHUKUA ABIDAL BAADA YA KUTEMWA BARCELONA.

KLABU ya AS Monaco ya Ufaransa imefanikiwa kumsajili Eric Abidal kwa usajili huru baada ya beki huyo kutemwa na klabu ya Barcelona ya Hispania. Abidal mwenye umri wa miaka 33 amesaini mkataba wa mwaka mmoja na klabu hiyo ambayo ndio aliyomkuza huku akiwa na uwezo wa kuongeza msimu mmoja zaidi akiamua. Beki huyo alianza kucheza soka la kulipwa akiwa na Monaco lakini aliitema klabu hiyo na kwenda Lille katika kipindi cha majira ya kiangazi mwaka 2002 ambapo kabla ya kwenda Barcelona mwaka 2007 alicheza pia katika timu ya Olympique Lyon. Abidal ameshinda mataji manne ya Ligi Kuu nchini Hispania, makombe mawili ya Mfalme na mawili mengine ya Ligi ya Mabingwa Ulaya katika kipindi cha miaka sita ambayo amekuwepo Barcelona lakini msimu uliopita alikuwa nje ya kikosi cha timu hiyo kwasababu za kiafya.