WILLIAMS, AZARENKA KUKWAANA FAINALI US OPEN.

BINGWA mtetezi Serena Williams atachuana na Victoria Azarenka katika fainali ya michuano ya wazi ya Marekani baada ya kushinda mechi zao za nusu fainali. Azarenka raia wa Belarus anayeshika namba mbili kwa ubora duniani alifanikiwa kumgaragaza Flavia Pennetta wa Italia kwa 6-4 6-2 katika mchezo uliofanyika katika Uwanja wa Arthur Ashe jijini New York. Kwa upande wa Williams mwenye umri wa miaka 31 naye alitinga hatua hiyo kwa kishindo baada ya kumchabanga Li Na wa China kwa 6-0 6-3. Fainali ya michuano hiyo kwa upande wa wanawake itakuwa kama marudio ya fainali ya mwaka jana ambapo wawili hao pia walikutana na Williams kuibuka kidedea.