BINGWA WA MASHINDANO YA INDYCAR ANUSURIKA KATIKA AJALI.

BINGWA mara nne wa michuano ya IndyCar, Dario Franchitti amepata majeraha katika uti wake wa mgongo katika ajali aliyopata katika mashindano ya Grand Prix yaliyofanyika jijini Houston. Franchitti mwenye umri wa miaka 40 raia wa Scotland mbali na kuumia uti wake mgongo lakini pia alivunjika kifundo chake cha mguu baada ya kugonga kingo za barabara kwenye mashindano hayo. Gari lake alilokuwa akitumia lilipaa kufuatia kugongana katika mzunguko wa mwisho na Takuma Sato ambapo mashabiki 13 walikuwa wakifuatilia mashindano hayo nao waliumia na kukimbizwa hospitali kwa matibabu. Dereva Will Power ndiye aliyeshinda mbio hizo huku dereva mwenzake Franchitti, Scott Dixon kutoka New Zealand ndio anaongoza msimamo wa jumla.