ZIDANE AMPIGIA DEBE RIBERY KUCHUKUA BALLON D'OR.

NGULI wa zamani wa soka wa Ufaransa, Zinedine Zidane anaamini kuwa Franck Ribery anastahili kushinda tuzo ya mwanasoka bora wa dunia maarufu kama Ballon d’Or dhidi ya Cristiano Ronaldo lakini amekiri kuwa anaweza kuikosa kwa ajili ya Lionel Messi. Winga huyo mahiri wa klabu ya Bayern Munich amefunga mabao 11 na kutengeneza mengine 19 katika mashindano yote msimu uliopita ambapo Bayern walishinda mataji ya Bundesliga, DFB-Pokal na Ligi ya Mabingwa Ulaya. Hata hivyo Ribery atakabiliwa na upinzani kutoka kwa nyota hao Messi wa Barcelona na Ronaldo wa Real Madrid ambao tayari wameshanyakuwa tuzo hiyo. Zidane amesema Ribery na Ronaldo wote wanastahili tuzo hiyo lakini anampa nafasi zaidi Ribery kutokana na mafanikio aliyopata msimu uliopita ingawa anakiri kuwa Messi anaweza kuwa kikwazo kwasababu naye amefunga mabao 55 katika mashindano yote msimu uliopita.