ARSENAL YAMNASA MTOTO WA BECKHAM.

MTOTO wa mchezaji nyota na nahodha wa zamani wa kimataifa wa Uingereza, David Beckham aitwaye Brooklyn ameripotiwa kusajiliwa katika shule ya soka ya Arsenal pamoja na kutakiwa na Chelsea na klabu ya zamani ya baba yake ya Manchester United. Mtoto huyo mkubwa wa Beckham alikuwa akitakiwa na vilabu kadhaa vya Ligi Kuu lakini mwenyewe anaonekana kuchagua Arsenal baada ya kuwashawishi makocha wa timu hiyo. Brooklyn amekuwa akifanya mazoezi na Arsenal akiichezea timu ya vijana chini ya umri wa miaka 15, huku pia akiwa amewahi kufanya majaribio katika timu za Chelsea, United, Queens Park Rangers na Fulham. Taarifa hizo zimedai kuwa Brooklyn ambaye anapenda kucheza kama winga wa kulia, anaweza kupewa mkataba kamili kama akiwashawishi walimu wakati wa kipindi hiki cha mkataba wa muda aliopewa. Pamoja na historia ndefu ya Beckham huko Old Trafford, familia hiyo imekuwa na mahusiano ya karibu sana na Arsenal ambapo watoto wake wengine Cruz na Romeo wamekuwa wachezaji katika vikosi vya watoto chini ya umri wa miaka 13 na 10.