HAKUNA ANAYEWEZA KUISHIKA CHELSEA MSIMU HUU - WENGER.

MENEJA wa klabu ya Arsenal, Arsene Wenger anaamini hakuna timu inayoweza kuwapata vinara wa Ligi Kuu Chelsea msimu huu. Arsenal walichapwa mabao 2-1 nyumbani kwa Swansea City jana na kuteleza nyuma ya Chelsea ambao hawajafungwa msimu huu kwa tofauti alama 12. Chelsea wameshinda michezo yao tisa kati ya 11 msimu huu na kujikusanyia alama 29, nne zaidi ya Southampton wanaoshika nafasi ya pili katika msimamo huo. Akihojiwa Wenger amesema kama Chelsea wakiendelea na makali yao hayo hadhani kama kuna timu ya kuwashika msimu huu kwani inaonekana hakuna timu inayoweza kupambana nao kwasasa. Chelsea walipambana na kuhakikisha wanatoka nyuma na kuifunga Liverpool mabao 2-1 katika Uwanja wa Anfield Juzi na Wenger anaamini kikosi chao kimejitengenezea hali ya kujiamini.