JUVENTUS WAMALIZA MWAKA WAKIWA VINARA SERIE A.

KLABU ya Juventus wamejihakikishia kumaliza mwaka 2014 wakiwa vinara wa Serie A kwa kuichapa Cagliari kwa mabao 3-1 jana. Mabao yaliyofungwa na Carlos kwa shuti la karibu katika dakika 10 kabla ya Arturo Vidal hajafunga kwa mara ya kwanza bao mwanana lililotokana na kona aliyopita yalitosha kuifanya Juventus kwenda mapumziko wakiwa kifua mbele. Fernando Llorente ndio alihitimisha karamu ya mabao ya Juventus kabla ya Luca Rossettini hajaifungia bao la kufutia machozi Cagliari ambalo hata hivyo halikutosha kuwatoa katika mstari wa kushuka daraja. Juventus sasa wako kileleni mwa msimamo wa ligi kwa tofauti ya alama nne na AS Roma ambao wanakabiliwa na mchezo dhidi ya AC Milan kesho.