MALI ITASHINDA AFCON - YATABARE.

KIUNGO wa kimataifa wa Mali, Sambou Yatabare anaamini nchi yake ina uwezo wa kunyakuwa taji la michuano ya Mataifa ya Afrika mwakani. Mali haijawahi kushinda taji la michuano hiyo lakini wamewahi kufanikiwa kumaliza katika nafasi ya pili mwaka 1972 na nafasi ya tatu mwaka 2012 na 2013. Yatabare mwenye umri wa miaka 25 amesema wanajiamini na kama wakicheza kwa asilimia 100 anadhani wanaweza kuibuka na taji hilo. Kiungo aliendelea kudai kuwa malengo ya timu zote ni kwenda katika mashindano na kushinda kwani kama huamini unaweza ni bora ukae nyumbani. Mali walitandikwa mabao 3-2 na Congo katika fainali iliyofanyika nchini Cameroon miaka 42 iliyopita na kizazi cha sasa kimepania kufanya vizuri zaidi katika michuano ya mwakani huko Guinea ya Ikweta. Mali wamepangwa katika kundi D ambalo linahesabika kuwa gumu likiwa na timu za Cameroon, Ivory Coast na Guinea.