MENDES ADAI RONALDO ANA THAMANI YA PAUNDI BILIONI MOJA.

WAKALA wa mshambuliaji nyota wa kimataifa wa Ureno Cristiano Ronaldo amesema anaweza kumuuza mchezaji huyo kwa kitita cha paundi milioni 300 kama Real Madrid wataamua kumuachia aondoke kesho. Wakala huyo Jorge Mendes amesema Ronaldo ni mchezaji bora ambaye hajapata kutokea duniani na huwezi kumlinganisha na mchezaji yeyote yule. Ronaldo mwenye umri wa miaka 29 alichaguliwa kuwa mchezaji bora wa dunia kwa mara ya tatu mwezi uliopita na kumshinda Lionel Messi katika tuzo hizo. Akiulizwa Ronaldo ana thamani gani kwasasa, Mendes amesema nyota huyo ana thamani ya paundi bilioni moja. Mendes aliendele kudai kuwa kama kwasababu yeyote Madrid wakiamua kumuuza mchezaji huyo kwa paundi milioni 300, ipo klabu itakayotoa fedha hizo. Hata hivyo, Mendes amesisitiza Ronaldo ambaye aliigharimu Madrid kitita cha paundi milioni 80 mwaka 2009 ataendelea kubakia Bernabeu pamoja na mapenzi makubwa waliyonayo mashabiki wa klabu yake ya zamani ya Manchester United.