KOCHA WA BARCELONA ATAMBA KUWA WAKO TAYARI KWA AJILI YA MADRID.

MENEJA wa Barcelona, Luis Enrique amefurahi jinsi wachezaji wake walivyowasambaratisha Manchester City jana na kudai kuwa sasa wanaelekea katika mchezo wao wa El Classico Jumapili hii wakiwa katika hali nzuri. Barcelona waliwatandika mabingwa wa Uingereza City kwa bao 1-0 katika mchezo huo uliofanyika katika Uwanja wa Camp Nou na kuwafanya kutinga hatua ya robo fainali kwa jumla ya mabao 3-1. Akihojiwa Enrique amesema katika mchezo huo walitengeneza nafasi nyingi na kufikia malengo yao waliyokuwa wamejiwekea ambayo ni kushinda mchzo huo. Kocha huyo aliendelea kudai kuwa kibarua chao kinachofuata ni mchezo wao dhidi ya Real Madrid na kwa jinsi walivyocheza vyema dhidi ya City anadhani wako katika hali nzuri ya kukwana na mahasimu wao hao. Hata hivyo, Enrique amesisitiza kuwa hadhani kama mchezo wao dhidi ya Madrid ndio utaamua bingwa wa La Liga msimu huu.