WENGER ADAI KUTOA KIPAUMBELE ZAIDI KWA LIGI YA MABINGWA ULAYA KULIKO KOMBE LA FA.

MENEJA wa klabu ya Arsenal, Arsene Wenger amekiri kupuuzia nafasi zao kadhaa walizopata katika Kombe la FA kwasababu ya michuano ya Ligi ya Mabingwa Ulaya. Arsenal inatarajiwa kukutana na Manchester United baadae leo katika Uwanja wa Old Trafford ambako walifungwa mabao 4-0 mwaka 2008 kabla ya kwenda kukutana na AC Milan. Akihojiwa Wenger amesema michuano hiyo huwa inakuwa imewekwa mahali pabaya kabla ya michuano ya Ligi ya Mabingwa hivyo siku zote huwa analazimika kufanya uchaguzi. Wenger amesema mara nyingi huwa anawapumzisha wachezaji wake nyota katika mechi za Kombe la FA kwa ajili ya kuwaweka fiti katika mechi za Ligi ya Mabingwa Ulaya. Safari hii hali imekuwa nyepesi kidogo kwa Arsenal kwani mchezo wao wa marudiano dhidi ya AC Milan unatarajiwa kufanyika Machi 17 hivyo kumpa nafasi Wenger kupanga kikosi kamili katika mchezo wao wa leo.