BENZEMA BADO ANA NDOTO ZA KUNYAKUWA BALLON D'OR.

MSHAMBULIAJI wa klabu ya Real Madrid, Karim Benzema amebainisha kuwa ana ndoto za kushinda tuzo ya Ballon d’Or katika siku zijazo, ingawa anafahamu itamuwia vigumu kufikia malengo yake hayo. Mshambuliaji wa Barcelona Lionel Messi na Cristiano Ronaldo wa Madrid ndio wachezaji waliotawala tuzo hizo katika miaka ya karibuni ambapo Messi amenyakuwa mara nne huku Ronaldo yeye akichukua tuzo hizo mara tatu. Pamoja na hayo, nyota huyo wa kimataifa wa Ufaransa bado hataki kuzika ndoto zake hizo za siku moja kuja kutambuliwa kama mchezaji bora wa dunia. Akihojiwa Benzema amesema kushinda Ballon d’Or bado ni jambo lililopo katika ndoto zake na anaendelea kulifanyia kazi. Benzema aliendelea kudai kuwa kila mchezaji ana ndoto za siku moja kunyakuwa tuzo hiyo lakini anajua safari haiwezi kuwa rahisi kwani atahitaji kufunga mabao mengi zaidi na kunyakuwa mataji kadhaa katika kipindi cha mwaka mmoja.