MAN UNITED YAPANGWA KUCHEZA NA BRUGGE HATUA YA MTOANO LIGI YA MABINGWA ULAYA.

KLABU ya Manchester United imepangwa kucheza dhidi ya Club Brugge katika mchezo wa mtoano kufuzu michuano ya Ligi ya Mabingwa Ulaya, katika ratiba iliyopangwa jiji Lyon leo. United ilimaliza katika nafasi ya nne katika msimamo wa Ligi Kuu msimu uliopita hivyo kuwafanya kulazimika kucheza mchezo huo wa mikondo miwili ambapo mshindi wake moja kwa moja anafuzu hatua ya makundi ya michuano hiyo. Mchezo wa mkondo wa kwanza baina ya timu hizo utachezwa katika Uwanja wa Old Trafford Agosti 18 mwka huu huku ule wa marudiano ukichezwa katika Uwanja wa Jan Breydel Agosti 26. Brugge walifuzu hatua hiyo ya mtoano kwa kuifunga Panathinaikos kwa jumla ya mabao 4-2 katika michezo miwili waliyochezwa. Mechi zingine za mtoano zitawakutanisha Lazio dhidi ya Bayer Leverkusen, Valencia dhidi ya Monaco na mabingwa wa Scotland Celtic wao watachuana na Malmo.