IBRAHIMOVIC KUKUTANA NA TIMU YAKE YA UTOTONI LEO.

MSHAMBULIAJI mahiri wa Paris Saint-Germain-PSG, Zlatan Ibrahimovic anatarajiwa kupambana kwa mara ya kwanza timu ya kutoka mji aliotoka na aliyoanza nayo safari ya soka lake wakati watakapovaana na Malmo baadae leo. PSG ambao ni mabingwa Ufaransa na Malmo mabingwa Sweden watakutana katika mchezo wa ufunguzi wa michuano ya Ligi ya Mabingwa Ulaya wa kundi A ambalo pia lina timu za Real Madrid Shakhtar Donetsk. Huo utakuwa mchezo wa kipekee kwa Ibrahimovic ambaye amekulia katika mji huo uliopo kusini mwa Sweden na kufunga mabao 16 katika mechi 40 za ligi alizoichezea Malmo kabla ya kujiunga na Ajax Amsterdam mwaka 2001. Nyota huyo mbali na kuichezea Ajax lakini pia alifanikiwa kung’aa akiwa katika timu za Juventus, Inter Milan, AC Milan na Barcelona. Baada ya Malmo kuifunga Celtic kwa jumla ya mabao 4-3 katika mechi za kufuzu hatua ya makundi, Ibrahimovic mwenye umri wa miaka 33 aliandika katika ukurasa wake wa mtandao wa kijamii wa twitter akieleza tamaa ya kutaka kucheza dhidi ya timu hiyo.