DEBUCHY AENDA BOURDEAUX KWA MKOPO.

BEKI wa kimataifa wa Ufaransa, Mathieu Debuchy amejiunga na klabu ya Ligue 1 ya Bourdeaux kwa mkopo akitokea Arsenal. Hatua ya beki huyo kuondoka imekuja kwasababu ya kutaka muda mwingi wa kucheza ili aweze kujihakikishia nafasi ya kuwemo katika kikosi cha Ufaransa katika michuano ya Euro 2016. Debuchy mwenye umri wa miaka 30 amecheza mechi saba pekee akiwa na Arsenal msimu huu na hakujumuishwa katika kikosi cha Ufaransa kilichocheza na Ujerumani na Uingereza Novemba mwaka jana. Beki huyo aliwahi kukaririwa mwezi Desemba mwaka jana akidai kuw anahitaji muda zaidi wa kucheza jambo ambalo anadhani ndio lilisababisha kocha wa Ufaransa Didier Deschamps kutomuita katika mechi mbili zilizopita. Ufaransa ndio watakaokuwa wenyeji wa michuano hiyo ambayo inatarajiwa kutimua vumbi Juni 10 na kumalizika Julai 10.