SEVILLA KUVAANA NA BARCELONA FAINALI KOMBE LA MFALME.

KLABU ya Sevilla sasa wanatarajia kukwaana na Barcelona katika fainali ya Kombe la Mfalme baada ya kupata sare ya mabao 2-2 ugenini dhidi ya Celta Vigo jana na kuwafanya kusonga mbele kwa jumla ya mabao 6-2 katika michezo miwili waliokutana. Wiki iliyopita Sevilla walijitengenezea mazingira mazuri ya kusonga mbele bada ya kushinda mabao 4-0 katika mchezo wa mkondo wa kwanza. Celta Vigo walianza vyema kwa kuongoza kwa mabao 2-0 mpaka muda wa mapumziko jana lakini walijikuta wakishindwa kuulinda ushindi na Sevilla kusawazisha mabao yote mawili. Sevilla na Barcelona walikutana katika fainali ya Super Cup ya Ulaya huko Tbilisi mwanzoni mwa kampeni na Barcelona kuibuka ushindi wa mabao 5-4 katika muda wa nyongeza. Fainali ya Kombe la Mfalme inatarajiwa kuchezwa Mei 21 mwaka huu katika uwanja ambao utatajwa baadae.