MBIO ZA LIGI KUU SIO KWA SPURS NA LEICESTER PEKE YAO.

MENEJA wa Tottenham Hotspurs, Mauricio Pochettino amesema timu saba bado zina nafasi ya kushinda taji la Ligi Kuu msimu huu na kuondoa uvumi kuwa mbio hizo zimebaki kwa timu mbili wao na Leicester City. Spurs ambao watawafuata Liverpool Jumamosi hii, wako alama tano nyuma ya Leicester ambao wanaongoza huku kukiwa kumebaki mechi saba. Spurs ambao wanafukuzia taji lao la kwanza la ligi toka mwaka 1961, wako alama sita mbele ya Arsenal waliopo nafasi ya tatu ingawa vijana hao wa Arsene Wenger wana mchezo mmoja mkononi. Akihojiwa kuhusiana na suala hilo, Pochettino amesema kwasasa wanashindana na timu tofauti sio Leicester pekee lakini pia Arsenal, Manchester City, Manchester United, West Ham United na Southampton. Meneja huyo aliendelea kudai kuwa kimahesabu timu zote hizo zinaweza kutwaa taji kwani michezo saba bado ni alama nyingi.