IBRAHIMOVIC ATHIBITISHA KWENDA MAN UNITED.

MSHAMBULIAJI mkongwe wa kimataifa wa Sweden, Zlatan Ibrahimovic ametangaza katika mitandao ya kijamii kuwa atajiunga na Manchester United. Ibrahimovic mwenye umri wa miaka 34, alikuwa mchezaji huru baada ya mkataba wake na klabu ya Paris Saint-Germain kumalizika Alhamisi iliyopita. Nyota huyo mara baada ya mkataba wake na PSG kumalizika jana, aliandika katika ukurasa wake wa Instagram kuwa sasa ni muda muafaka kwa dunia kufahamu kuwa atakwenda kucheza Manchester United. Taarifa zinadai kuwa Ibrahimovic bado hajasaini au kufanyiwa vipimo wakati akitangaza mpango wake huo na United hawajathibitisha uhamisho wake. Hata hivyo, makubaliano ya awali ya mkataba wa mwaka mmoja yanadaiwa kuwa yaliafikiwa wiki mbili zilizopita na kilichochelewesha kukamilika kwa dili hilo ni mkataba wake PSG. United ilitangaza mapema jana kuwa wanatarajia kucheza Galatasaray mchezo wa kirafiki ambao utafanyika nchini Sweden anapotoka Ibrahimovic Julai 30 mwaka huu.