WENGER ATAMBA NA SARE YA PSG.

MENEJA wa Arsenal, Arsene Wenger amewapongeza wachezaji wake kwa utulivu baada ya kutoka nyuma na kulazimisha sare ya bao 1-1 dhidi ya Paris Saint-Germain katika mchezo wao wa ufunguzi wa kundi A wa michuano ya Ligi ya Mabingwa Ulaya jana usiku. Edinson Cavani aliipatia bao PSG baada ya sekunde 44 toka kuanza kwa mchezo huku akikosa mengine kadhaa ambayo yangeifanya timu yake kuwa mbele kwa zaidi ya bao moja kabla ya mapumziko. Kipindi cha pilia Arsenal waliamka na kuimarika zaidi na kufanikiwa kuaswazisha bao hilo katika moja ya nafasi chache walizotengeneza kupitia kwa Alexis Sanchez. Akihojiwa mara baada ya mchezo huo, Wenger amesema hawakuanza vyema mchezo huo na wangeweza hata kufungwa zaidi lakini anashukuru wachezaji wake walijitahidi kuwa watulivu. Meneja huyo aliongeza kuwa kipindi cha pili walikuwa imara zaidi na walinufaika kwani wapinzani wao hawakuwa vizuri kama walivyocheza kipindi cha kwanza.