BELLERIN KUONGEZWA MKATABA ARSENAL.

MENEJA wa Arsenal, Arsene Wenger amethibitisha mipango ya kumuongeza mkataba mpya Hector Bellerin wakati ambao Barcelona nao wanamuwinda beki huyo wa kimataifa wa Hispania. Bellerin alijiunga na akademi ya Arsenal akitokea ile ya Barcelona ya La Masia mwaka 2011 na kuibukia katika kikosi cha kwanza mwaka 2014. Msimu uliopita Bellerin alicheza mechi zote za Ligi Kuu za Arsenal huku mwaka huu pia akiendelea kupata nafasi katika klabu hiyo ambayo imepelekea kuitwa katika kikosi cha Hispania. Barcelona walishawahi kumrejesha Cesc Fabregas Camp Nou baada ya kupitia uelekeo kama wa Bellerin na wamekuwa wakihusishwa na tetesi za nyota huyo mwenye umri wa miaka 21 katika kipindi hiki ambacho wanataka kuziba nafasi ya Dani Alves. Akihojiwa Wenger ameshangazwa na taarifa hizo kwani beki huyo bado ana miaka mitatu katika mkataba wake Emirates na kubainisha kuwa klabu hiyo inajipanga kumuongezea miaka mingine zaidi.