Ivory Coast Vs Equatorial Guinea 3-0 All Goals & Full Highlights 04-02-1...

Zambia VS Sudan 3-0 All Goals Highlights 04/02/2012 CAF Africa Cup

TAARIFA MBALIMBALI KUTOKA TFF LEO.

MTIHANI WA MAWAKALA WA WACHEZAJI
Mtihani wa uwakala wa wachezaji (players agent) wa Shirikisho la Kimataifa la Mpira wa Miguu (FIFA) utafanyika Alhamisi ya Machi 29 mwaka huu saa 10 kamili asubuhi kwenye ofisi za Shirikisho la Mpira wa Miguu Tanzania (TFF). Kutakuwa na jumla ya maswali 20 kwenye mtihani huo, 15 yanatoka FIFA kuhusiana na kanuni za kimataifa za mpira wa miguu na matano yatatoka TFF kuhusiana na kanuni mbalimbali zinazotawala mchezo huo nchini. Kwa ambao wangependa kufanya mtihani huo utakaokuwa katika lugha ya Kiingereza wanatakiwa kujisajili TFF kwa ada ya dola 50 za Marekani ambapo watapewa utaratibu na maeneo ambapo mtihani huo unalenga. Muda wa kufanya mtihani hautazidi dakika 90. Mtihani uliopita ulifanyika Septemba 29 mwaka jana ambapo watahiniwa wanane walijitokeza na kufanya mtihano huo. Mpaka sasa Tanzania ina mawakala saba wa wachezaji wanaotambuliwa na FIFA. Mawakala hao ni Ally Mleh wa Manyara Sports Management, Damas Ndumbaro, John Ndumbaro, Mehdi Remtulla, Ally Saleh, Yusuf Bakhresa na Said Tully.

RAUNDI YA 16 LIGI KUU YA VODACOM
Mzunguko wa 16 wa Ligi Kuu ya Vodacom kuwania ubingwa wa Tanzania Bara unaanza kesho (Februari 4 mwaka huu) kwa mechi tatu. Coastal Union itakuwa mgeni wa Moro United kwenye Uwanja wa Azam ulioko Chamazi, Dar es Salaam. Nayo Villa Squad itakuwa mwenyeji wa Simba kwenye Uwanja wa Taifa, Dar es Salaam wakati Ruvu Shooting na Polisi Dodoma zitaoneshana kazi kwenye Uwanja wa Mabatini ulioko Mlandizi mkoani Pwani. Viingilio kwa mechi ya Uwanja wa Taifa, Dar es Salaam vitakuwa sh. 3,000 kwa viti vya bluu na kijani, sh. 5,000 kwa viti vya rangi ya chungwa, sh. 10,000 kwa VIP B na C, sh. 15,000 kwa VIP A wakati Uwanja wa Chamazi ni sh. 10,000 kwa Jukwaa Kuu na sh. 3,000 mzunguko. Kwa mechi ya Mlandizi kiingilio ni sh. 2,000 kwa mzunguko wakati Jukwaa Kuu itakuwa sh. 5,000. Pia Shirikisho la Mpira wa Miguu Tanzania (TFF) limefanya mabadiliko ya muda wa kuanza mechi za ligi hiyo kwa kituo cha Dar es Salaam. Mechi zinazochezwa wikiendi kwenye Uwanja wa Taifa zitaaza saa 10 kamili jioni wakati zile zinazochezwa siku za kazi zitaanza saa 10.30 jioni. Mechi zote za Uwanja wa Azam- Chamazi zitaanza saa 10 kamili jioni.

MZUNGUKO WA PILI LIGI DARAJA LA KWANZA (FDL)
Mzunguko wa pili (second leg) wa Ligi Daraja la Kwanza (FDL) inayochezwa katika makundi matatu tofauti unaanza kesho (Februari 4 mwaka huu) kwa mechi sita. Katika kundi A, Morani FC itakuwa mwenyeji wa Burkina Faso ya Morogoro katika mchezo utakaochezwa Kiteto mkoani Manyara. Kwa upande wa kundi B timu zote sita zitakuwa uwanjani. Small Kids ya Rukwa itacheza na Polisi ya Iringa kwenye Uwanja wa Jamhuri mjini Morogoro, Mbeya City na Tanzania Prisons zitaumana kwenye Uwanja wa Kumbukumbu ya Sokoine jijini Mbeya na Majimaji na Mlale JKT watapepetana katika Uwanja wa Majimaji mjini Songea. Kundi C litaanza kwa mechi mbili ambapo AFC ya Arusha watakuwa wageni wa Manyoni mkoani Singida na Rhino na Polisi Tabora zitakwaruzana kwenye Uwanja wa Ali Hassan Mwinyi mjini Tabora. Mechi nyingine ya kundi hilo itakuwa kati ya 94 KJ na Polisi Morogoro ambayo itachezwa keshokutwa (Februari 5 mwaka huu) kwenye Uwanja wa Mabatini ulioko Mlandizi mkoani Pwani.

SIMBA, OLJORO JKT ZAINGIZA MIL 40
Pambano la Ligi Kuu ya Vodacom kati ya Simba na Oljoro JKT lililochezwa Februari Mosi mwaka huu Uwanja wa Taifa, Dar es Salaam limeingiza sh. 40,191,000. Jumla ya watazamaji waliokata tiketi kushuhudia mechi hiyo namba 105 kwa kiingilio cha sh. 3,000, sh. 5,000, sh. 10,000 na sh. 15,000 kwa VIP A walikuwa 11,860. Baada ya kuondoa gharama za awali za mchezo na asilimia 18 ya Kodi ya Ongezeko la Thamani (VAT) kila timu ilipata sh. 7,023,171, uwanja sh. 2,341,057, Chama cha Mpira wa Miguu Mkoa wa Dar es Salaam (DRFA) sh. 936,423, TFF sh. 2,341,057, Mfuko wa Maendeleo ya Mpira wa Miguu (FDF) sh. 1,170,528 na Baraza la Michezo la Taifa (BMT) sh. 234,106. Nayo mechi namba 104 kati ya African Lyon na Polisi Dodoma iliyochezwa Februari Mosi mwaka huu kwenye Uwanja wa Azam ulioko Chamazi, Dar es Salaam imeingiza sh. 45,000 kutokana na watazamaji 15 waliokata tiketi kushuhudia pambano hilo. Baada ya kuondoa asilimia 18 ya VAT ambayo ni sh. 6,864.41 kila timu ilipata sh. 2,591, Uwanja sh. 514, TFF sh. 514, DRFA sh. 205, FDF sh. 257 na BMT sh. 51.

OZIL ATAKA KUMALIZIA SOKA LAKE BERNABEU.

MSHAMBULIAJI wa Real Madrid Mesut Ozil amesema kuwa ana matumaini ya kubakia katika klabu hiyo katika kipindi chote cha uchezaji wake soka. Ozil mwenye umri wa miaka 23 alitua Bernabeu akitokea klabu ya Werder Bremen baada kuingoza Ujerumani katika michuano ya Kombe la Dunia mwaka 2010 ambapo amekuwa mchezaji tegemeo katika kikosi cha Mourinho. Akihojiwa mchezaji huyo amesema kuwa anahitaji kumalizia kucheza soka akiwa na klabu hiyo ingawa anajua bado miaka mingi mbele na itakuwa vigumu kwasababu watakuja wachezaji wengi katika miaka ijayo ambao watakuwa wazuri. Ozil pia anaamini kuwa msimu huu utaisha timu yake wakiwa mabingwa kama wataendelea kucheza kama wanavyocheza hivi sasa hakuna anayeweza kuwapita.

JOHANSSON AMUOMBA BLATTER KUJIUZULU.

RAIS wa zamani wa Shirikisho la Soka la Ulaya-UEFA Lennart Johansson ametuhumu rais wa Shirikisho la Soka la Dunia-FIFA kuongoza kimabavu na kumuhitaji kujiuzulu wadhifa huo. Johansson mwenye miaka 82 ambaye aliwahi kuwa makamu wa rais wa FIFA alishindwa katika uchaguzi wa mwaka 1998 akigombea nafasi ya urais wa FIFA ambapo alikuwa akigombania na Blatter na toka kipindi hicho amekuwa madarakani mpaka leo. Akihojiwa Johansson ambaye ni raia wa Sweden amesema lazima kufanyike mabadiliko ndani ya Shrikisho hilo ambalo kwa siku za karibuni limekumbwa na changamoto kubwa za rushwa.  Rais huyo wa zamani wa UEFA anaamini kuwa rais wa sasa wa UEFA Michel Platin ndiye anayefaa kukalia kiti cha Blatter akidai kuwa Platin amefanya mengi kwa Ulaya na ataweza kuibadilisha FIFA na kurudi katika hali yake ya kawaida.

FIFA YAOMBA RIPOTI YA MAUAJI MISRI.

SHIRIKISHO la Soka Duniani-FIFA limetaka taarifa kamili juu ya vurugu zilizotokea nchini Misri na kupelekea vifo vya watu wapatao 74. FIFA imeomba mamlaka husika kufafanua kwa kina chanzo haswa cha kuzuka kwa vurugu hizo wakati wa mchezo baina ya Al Ahly na Al Masry Jumatano. Katika barua aliyomwandikia rais wa Chama cha Soka cha Misri-EFA Samir Zaher rais wa FIFA Sepp Blatter amesema kuwa ni tukio la kuhuzunisha sana na lazima hatua za haraka zichukuliwe ili kuhakikisha vitendo kama hivyo havitokei tena. Blatter aliendelea kusema katika barua hiyo kuwa mchezo wa mpira wa miguu ni burudani hivyo hatupaswi kuruhusu watu wachache wavuruge amani ya mchezo huo. Wakati huohuo salamu za rambirambi zimeendelea kumiminika ambapo Zhang Jilong anayekaimu nafasi ya rais wa Shirikisho la Soka barani Asia-AFC ametuma salamu zake za rambirambi kwa EFA. Katika salamu zake hizo Jilong amesema kuwa wako pamoja na familia na marafiki walifariki katika janga hilo kubwa kutokea katika ulimwengu wa soka na kuomba wahusika wachuliwe hatua mara moja ili kulinda heshima ya mchezo huo.

FA KUJADILI JUU YA KUMVUA UNAHODHA TERRY.

SHIRIKISHO la Soka la Uingereza-FA wako katika majadiliano juu nahodha wa timu ya taifa ya nchi hiyo John Terry kama aendelee kuingoza timu hiyo au wamvue wadhifa huo wakati akisubiri kusikilizwa kwa kesi yake ambapo anatuhumiwa kwa kutoa kauli za kibaguzi. Terry ambaye kesi yake ilisikilizwa Jumatano alikatana kutenda kosa hilo la kumtolea maneno ya kibaguzi beki wa Queens Park Rangers Anton Ferdinand wakati wa mchezo wa Ligi Kuu wan chi hiyo. Terry ambaye pia ni nahodha wa Chelsea kesi yake itasikilizwa tena Julai mwaka huu baada ya michuano ya Kombe la Ulaya ambapo mchezaji anatarjiwa kuwepo katika kikosi hicho pamoja na kaka wa Anton anayechezea klabu Manchester United Rio Ferdinand. Kocha wa timu ya taifa a nchi hiyo Fabio Capello amekuwa akimkingia kifua nahodha wake huyo akidai kwamba hana hatia mpaka hapo itakapothibitika kwamba ni kweli alifanya kosa hilo.