VAN PERSIE, MANCINI WATWAA TUZO ZA MWEZI UINGEREZA.

MSHAMBULIAJI wa Arsenal Robin van Persie amepewa zawadi kwa mabao matatu-Hat-Trick aliyoshinda dhidi ya Chelsea wiki iliyopita baada ya kushinda tuzo ya mchezaji bora wa mwezi Octoba katika Ligi Kuu nchini Uingereza.
Nahodha huyo wa Arsenal amekuwa katika kiwango cha juu msimu huu akiwa amefunga mabao saba mwezi huo. Mabao ya mshambuliaji huyo wa kimataifa kutoka Uholanzi yameisaidia kikosi cha Arsenal kinachonolewa na Arsene Wenger baada ya kuanza vibaya msimu wa ligi hiyo pamoja na kukubali kipigo kikubwa cha mabao 8-2 kutoka Manchester United. Lakini kwa ushindi wa mabao 5-3 dhidi ya Chelsea katika Uwanja wa Stamford Bridge ni kama umeizindua timu hiyo na kuifanya ijiamini tena huku Van Persie akiwa mchuano wa kuwania kiatu cha dhahabu kwa kutupia mabao 10 mpaka hivi sasa. 

Kocha wa Manchester Roberto Mancini yeye ameteuliwa kuwa kocha bora wa mwezi baada ya kikosi cha kuongoza ligi kikiwa na pointi tano zaidi ya mahasimu wao Manchester United wanaoshika nafasi ya pili baada ya kuibanjua timu hiyo bila ya huruma katika Uwanja wa Old Traford wiki iliyopita.