WENGER KUVUNJA REKODI KWA KINDA WA BORUSSIA DORTMUND.

KWA mara ya kwanza kocha wa Arsenal Arsene Wenger anatarajiwa kuvunja rekodi katika manunuzi ya wachezaji toka alipochukua mikoba ya kuinoa timu hiyo baada ya kumtengea milioni 50 kinda wa Borussia Dortmund Mario Goetze. Kocha huyo alimwagiza Steve Rowley ambaye ndiye anayetafuta wachezaji wenye vipaji wa klabu hiyo kumtupia macho mchezaji huyo mwenye miaka 19 katika mchezo uliochezwa jijini Dortmund baina ya timu ya kinda huyo na Olympiakos Jumanne usiku. 

Wenger anamuona mchezaji huyo wa kimataifa kutoka Ujerumani kama kinda mwenye kipaji Ulaya kwa hivi sasa na yuko tayari kuvunja rekodi katika usajili ambapo mpaka sasa mchezaji aliyemsajili kwa bei ghali zaidi katika klabu hiyo ni Andrey Arshavin aliyemsajili kwa paundi milioni 15 kutoka klabu ya Zenit St Petersburg. Arsenal wanajiandaa kumyakua mchezaji huyo katika dirisha dogo la usajili ingawa klabu yake haijazungumza lolote kuhusu kumuachia kinda wao huyo mwenye kiwango cha juu.