BAFANA BAFANA YASHINDWA KUFUZU MICHUANO YA OLIMPIKI.

NDOTO za timu ya Taifa ya Afrika Kusini-Bafana Bafana kufuzu michuano ya olimpiki zilizimika jana usiku baada ya kukubali kipigo cha mabo 2-0 kutoka kwa Misri katika michuano hiyo ya vijana chini ya umri miaka 23 iliyofanyika jijini Marrakech, Morocco. Bafana Bafana ilikuwa inahitaji ushindi wa aina yoyote dhidi ya Misri katika mchezo wao huo wa mwisho wa kundi B ili kuweka matumaini hai ya kukata tiketi ya michuano hiyo lakini walishindwa kufikia hatua ya nusu fainali. Timu tatu za juu katika michuano hiyo zitafuzu moja kwa moja katika michuano hiyo itakayofanyika jijini London mwakani wakati timu itakayoshika nafasi ya nne itabidi icheze hatua ya mtoano na timu kutoka bara ya Asia. Afrika Kusini sasa itawakilishwa na timu moja ya wanawake-Banyana Banyana katika michuano hiyo ambao tayari wameshakata tiketi ya kucheza michuano hiyo.